काठमाडौं । नेपाली कांग्रेसको १५औँ महाधिवेशनमा सभापति पदका लागि तीन जनाले उम्मेदवारी दर्ता गराएका छन्। वर्तमान सभापति गगनकुमार थापा, नेता श्यामकृष्ण खड्गी र पूर्वसहमहामन्त्री किशोरसिंह राठौरले सभापति पदमा उम्मेदवारी दर्ता गराएका हुन्।
केन्द्रीय निर्वाचन समितिका अनुसार सभापति पदमा सबैभन्दा पहिले श्यामकृष्ण खड्गीले उम्मेदवारी दर्ता गराएका थिए। त्यसपछि वर्तमान सभापति थापा र अन्तिममा राठौरले उम्मेदवारी दर्ता गराएका हुन्।
तीन जनाको उम्मेदवारीसँगै कांग्रेसको नयाँ नेतृत्व चयनका लागि सभापति पदमा प्रतिस्पर्धा निश्चित भएको छ। थापा पुनः नेतृत्वमा दोहोरिने प्रयासमा छन् भने खड्गी र राठौरले पनि सभापति पदका लागि दाबेदारी प्रस्तुत गरेका छन्।
वरिष्ठ उपसभापतिमा विश्वप्रकाश, महिला उपसभापतिमा पुष्पा निर्विरोध
कांग्रेसको वरिष्ठ उपसभापति पदमा विश्वप्रकाश शर्मा निर्विरोध निर्वाचित भएका छन्। उक्त पदमा शर्माको मात्रै उम्मेदवारी परेपछि उनी निर्विरोध भएका हुन्।
त्यस्तै, महिला उपसभापति पदमा पुष्पा भुसाल पनि निर्विरोध निर्वाचित भएकी छन्। महिला उपसभापति पदमा उनको मात्रै उम्मेदवारी परेको हो।
कांग्रेसको संशोधित विधानअनुसार सिर्जना गरिएको वरिष्ठ उपसभापति पदमा शर्मा पहिलोपटक निर्वाचित भएका हुन्। शर्मा यसअघि विशेष महाधिवेशनबाट उपसभापति चयन भएका थिए भने १४औँ महाधिवेशनबाट महामन्त्री निर्वाचित भएका थिए।
असोज २२ गते मतदान
कांग्रेसको नयाँ नेतृत्व चयनका लागि आगामी बिहीबार, असोज २२ गते मतदान हुने कार्यतालिका छ। सभापतिसहित अन्य पदाधिकारी र केन्द्रीय सदस्यको निर्वाचनले पार्टीको आगामी नेतृत्व र आन्तरिक शक्ति सन्तुलन निर्धारण गर्नेछ।
महाधिवेशनमा विभिन्न पदका उम्मेदवारहरू प्रतिनिधिहरूको समर्थन जुटाउन सक्रिय छन्। सभापति पदमा तीन जनाबीच प्रतिस्पर्धा हुने भएपछि निर्वाचन परिणामलाई चासोका साथ हेरिएको छ।
