काठमाडौं । नेपाली कांग्रेसको वरिष्ठ उपसभापति पदमा विश्वप्रकाश शर्मा निर्विरोध निर्वाचित भएका छन्। पार्टीको जारी १५औँ महाधिवेशनअन्तर्गत वरिष्ठ उपसभापति पदमा शर्माको मात्रै उम्मेदवारी परेपछि उनी निर्विरोध निर्वाचित भएका हुन्।
कांग्रेसको केन्द्रीय निर्वाचन समितिका अनुसार मंगलबार (असोज २०) साँझ ७ बजेसम्म उम्मेदवारी दर्ताको समय तोकिएको थियो। निर्धारित समयभित्र वरिष्ठ उपसभापति पदमा शर्माको मात्रै उम्मेदवारी दर्ता भएपछि उनी निर्विरोध निर्वाचित भएका हुन्।
कांग्रेसको संशोधित विधानमार्फत १५औँ महाधिवेशनबाट पहिलोपटक वरिष्ठ उपसभापति पद सिर्जना गरिएको हो। यससँगै शर्मा उक्त पदमा निर्वाचित हुने पहिलो नेता बनेका छन्।
शर्मा यसअघि २०८२ साल पुसमा सम्पन्न कांग्रेसको विशेष महाधिवेशनबाट उपसभापति चयन भएका थिए। त्यसअघि उनी २०७८ सालमा सम्पन्न पार्टीको १४औँ महाधिवेशनबाट महामन्त्री निर्वाचित भएका थिए।
वरिष्ठ उपसभापतिमा शर्माको निर्विरोध चयनसँगै कांग्रेसको नयाँ नेतृत्व चयन प्रक्रियामा एउटा महत्त्वपूर्ण पदको टुंगो लागेको छ। अब अन्य पदाधिकारी तथा केन्द्रीय सदस्यको निर्वाचनले पार्टीभित्रको आगामी शक्ति सन्तुलन निर्धारण गर्नेछ।
