मृत्युदण्डलाई मानव मर्यादामाथिको आक्रमण भन्दै पोप लियो चौधौँले विरोध जनाएका छन्। अक्टोबर १०, २०२६ मा मृत्युदण्डविरुद्धको विश्व दिवसका अवसरमा उनले मृत्युदण्डलाई “अस्वीकार्य” भन्दै सामाजिक सञ्जालमा आफ्नो धारणा सार्वजनिक गरेका हुन्। यही समयमा अमेरिकी रक्षा मन्त्रालयले सन् २००९ को फोर्ट हुड गोलीकाण्डमा दोषी ठहरिएका पूर्व सैनिक चिकित्सक निदाल हसनलाई दिइने मृत्युदण्ड प्रत्यक्ष प्रसारण गर्ने सम्भावनाबारे विवाद चर्किएको छ।
पोपका शीर्ष सहयोगी कार्डिनल पिएत्रो पारोलिनले मृत्युदण्डलाई प्रत्यक्ष प्रसारण गर्ने योजनालाई “अस्वीकार्य” भन्दै मानिसको मृत्युलाई तमासामा परिणत गर्न नहुने बताएका छन्।
अमेरिकी उपराष्ट्रपति जेडी भान्सले आफू क्याथोलिक धर्मावलम्बी भए पनि मृत्युदण्डको प्रत्यक्ष प्रसारण नहेर्ने बताएका छन्। उनले मृत्युदण्डको विधिबारेको विवादले हसनले गरेका अपराधको गम्भीरताबाट ध्यान अन्यत्र मोड्न सक्ने टिप्पणी गरेका छन्। उनी मृत्युदण्डकै विरोधमा भने उभिएका छैनन्।
हसनलाई डिसेम्बर ३ मा गोली हानेर मृत्युदण्ड दिने तालिका छ। सन् २००९ मा टेक्सासस्थित फोर्ट हुड सैन्य अखडामा भएको गोलीकाण्डमा उनले १३ जनाको हत्या गरेका थिए भने ३२ जना घाइते भएका थिए। सन् २०१३ मा दोषी ठहरिएका हसनको मृत्युदण्ड अमेरिकी सेनाले सन् १९४५ पछि पहिलोपटक गोली हानेर कार्यान्वयन गर्न लागेको घटना हुने बताइएको छ।
राष्ट्रपति डोनाल्ड ट्रम्पले भने मृत्युदण्डको प्रत्यक्ष प्रसारणलाई अन्तिम स्वीकृति दिने वा नदिनेबारे निर्णय गरिनसकेको बताएका छन्। रक्षामन्त्री पीट हेगसेथले सार्वजनिक प्रसारणको पक्षमा वकालत गरिरहेका बेला धार्मिक नेता, मानवअधिकारकर्मी र केही अमेरिकी सांसदले यसलाई मृत्युलाई तमासामा परिणत गर्ने प्रयास भन्दै विरोध गरेका छन्।
मुख्य विवाद अब मृत्युदण्ड दिने कि नदिने भन्नेमा मात्र सीमित छैन, राज्यले सजाय कार्यान्वयनलाई सार्वजनिक दृश्यका रूपमा प्रसारण गर्नु न्याय हो कि मानवीय मर्यादामाथिको प्रश्न? यही बहसले अमेरिका र भ्याटिकनबीच मृत्युदण्डसम्बन्धी दृष्टिकोणको भिन्नतालाई पुनः चर्चामा ल्याएको छ।
