प्रधानमन्त्री सुशीला कार्कीका तर्फबाट बधाइ सन्देश बोकेर परराष्ट्र मन्त्री बालानन्द शर्मा बंगलादेश जाँदै छन् ।
प्रधानमन्त्री कार्कीको पत्र बोकेर शर्मा बंगलादेश नेसनालिस्ट पार्टीका नेता तरिक रहमानले त्यहाँको प्रधानमन्त्रीका रुपमा लिन लागेको शपथग्रहण समारोहमा सहभागी हुन लागेका हुन् ।
प्रधानमन्त्री कार्कीले बंगलादेश सरकार र त्यहाँका जनतालाई १३औँ संसदीय निर्वाचन सफलतापूर्वक सम्पन्न गरेकोमा हार्दिक बधाई तथा शुभकामना व्यक्त गर्नुभएको छ ।
उहाँले बंगलादेश नेसनालिस्ट पार्टी र यसका नेता तरिक रहमानलाई यस विजयको नेतृत्व गरेकोमा विशेष बधाई दिनुभएको छ।
सन्देशमा प्रधानमन्त्री कार्कीले नेपाल र बंगलादेशबीचको मैत्रीपूर्ण छिमेकी सम्बन्धलाई अझ सुदृढ बनाउँदै पारस्परिक हितका क्षेत्रहरूमा सहकार्य विस्तार गर्न नजिकबाट काम गर्ने अपेक्षा व्यक्त गर्नुभएको छ।
सम्पन्न संसदीय निर्वाचनलाई देशको लोकतान्त्रिक प्रक्रियालाई पुनःस्थापित गर्ने महत्त्वपूर्ण अवसरका रूपमा हेरिएको छ। राजनीतिक ध्रुवीकरण र केही हिंसात्मक घटनाबीच बंगलादेशमा निर्वाचन सम्पन्न गर्नु चुनौतीपूर्ण मानिएको थियो।
रहमानले १७ फेब्रुअरी (फेब्रुअरी) मा बंगलादेशको नयाँ प्रधानमन्त्रीका रूपमा शपथ लिँदै छन् । उनको शपथग्रहण समारोहमा शेख हसिनालाई आश्रय दिइरहेको छिमेकी भारतसहित १३ देशलाई निम्ता गरिएको छ ।
उनको शपथ समारोह परम्परागत रूपमा राष्ट्रपति भवनमा नभई ढाकास्थित राष्ट्रिय संसद् भवन परिसरको साउथ प्लाजामा आयोजना गरिने भएको छ ।
ढाकाले यस समारोहमा सहभागी हुन भारतका प्रधानमन्त्री नरेन्द्र मोदीसहित विभिन्न १३ देशका नेताहरूलाई निमन्त्रणा पठाएको छ ।
सञ्चार माध्यमहरुका अनुसार, बंगलादेशले अधिकांश सार्क सदस्य देशका नेताहरूलाई आमन्त्रण गर्ने निश्चित भएको थियो । बंगलादेशले निमन्त्रणा पठाएका १३ देशमा चीन, भारत, मलेसिया, साउदी अरेबिया, टर्की, पाकिस्तान, युएइ, कतार, ब्रुनाइ, श्रीलंका, नेपाल, माल्दिभ्स र भुटान रहेका छन् । नेपालका तर्फबाट प्रधानमन्त्री कार्की जान नभ्याउने भएपछि उनले परराष्ट्रमन्त्री शर्मालाई पठाएकी हुन् ।
आम निर्वाचनमा जित हासिल गरेपछि सञ्चारमाध्यमलाई प्रतिक्रिया दिंदै रहमानले सार्कलाई पुनः सक्रिय बनाउन आफूले पहल गर्ने बताएका छन् ।
