इन्टरनेसनल क्रिकेट काउन्सिल (आइसिसी) को अध्यक्ष पदमा जय शाह दोस्रो कार्यकालका लागि निर्विरोध पुनःनियुक्त भएका छन्। इन्डोनेसियाको बालीमा सम्पन्न आइसिसी बोर्ड बैठकका क्रममा निर्देशकहरूको प्रस्तावमा सोमबार (नोभेम्बर १६, २०२६) उनको नाम सर्वसम्मत रूपमा अनुमोदन गरिएको हो। अध्यक्ष पदका लागि अन्य कुनै पनि उम्मेदवारको मनोनयन नपरेपछि निर्वाचनबिनै शाह पुनः अध्यक्ष बनेका हुन्।

​विश्व क्रिकेटको महत्त्वपूर्ण मोडमा नेतृत्वको निरन्तरता र स्थायित्व कायम राख्न बोर्ड सदस्यहरूले शाहमाथि पुनः विश्वास व्यक्त गरेका हुन्। यसअघि न्युजिल्यान्डका ग्रेग बार्कलेको स्थान लिँदै सन् २०२४ डिसेम्बर १ मा कार्यभार सम्हालेका शाह आइसिसीको इतिहासकै सबैभन्दा कान्छो अध्यक्ष हुन्। ३८ वर्षीय शाह जगमोहन डालमिया, शरद पवार, एन. श्रीनिवासन र शशाङ्क मनोहरपछि आइसिसीको नेतृत्व गर्ने पाँचौँ भारतीय प्रशासक समेत हुन्।

​आइसिसीका अनुसार शाहको आगामी कार्यकाल विश्व क्रिकेटको विस्तारका दृष्टिकोणले निकै निर्णायक रहनेछ। उनको दोस्रो कार्यकालमा सन् २०२८ को लस एन्जलस ओलम्पिकमा सन् १९०० पछि पहिलोपटक क्रिकेटको ऐतिहासिक पुनरागमन गराउने मुख्य कार्यभार रहनेछ। उक्त ओलम्पिकमा पुरुष र महिला दुवैतर्फको टि–२० प्रतियोगिता समावेश गरिनेछ।

​यसका साथै, सन् २०२७ मा दक्षिण अफ्रिकी क्षेत्रमा आयोजना हुने पुरुष एकदिवसीय विश्वकपको सफल व्यवस्थापन, महिला क्रिकेटको तीव्र विकास, एसोसिएट सदस्य राष्ट्रहरूमा अवसर सिर्जना तथा खेलको व्यावसायिक दायरा फराकिलो बनाउने विषयलाई उनले मुख्य प्राथमिकतामा राखेका छन्।