हङकङ उच्च अदालतका न्यायाधीश विलियम तामले स्थानीय समयअनुसार बिहान ९ः३० बजे सजाय निर्धारण गर्ने कार्यक्रम छ। वङले सन् २०२० मा निर्वासनमा रहेका अभियन्ता नाथन ल र अन्य व्यक्तिसँग मिलेर हङकङ तथा चीनको मुख्यभूमि सरकारविरुद्ध विदेशी प्रतिबन्ध, नाकाबन्दी वा अन्य शत्रुतापूर्ण कदम चाल्न आग्रह गरेको अभियोगमा सन् २०२६ को सेप्टेम्बरमा दोष स्वीकार गरेका थिए।
वङ सन् २०२० को नोभेम्बरदेखि हिरासतमा छन्। उनी यसअघि ‘हङकङ ४७’ नामले चिनिएको सरकारविरोधी गतिविधिसम्बन्धी मुद्दामा दोषी ठहर भएपछि चार वर्ष आठ महिनाको कैद सजाय भोगिरहेका छन्। नयाँ मुद्दा नआएको भए उनी सन् २०२७ को जनवरीमा रिहा हुने तालिका थियो।
राष्ट्रिय सुरक्षा कानुनअनुसार विदेशी शक्तिसँग मिलेमतो गरेको कसुरमा सामान्यतया तीनदेखि १० वर्षसम्म कैद सजाय हुन सक्छ। तर कसुरलाई ‘गम्भीर प्रकृतिको’ ठहर गरेमा न्यूनतम १० वर्षदेखि जन्मकैदसम्म सजाय हुन सक्ने कानुनी व्यवस्था छ।
वङका वकिल वरिष्ठ अधिवक्ता डेरेक चानले भने उक्त मुद्दा ‘गम्भीर प्रकृति’ को कसुरको मापदण्डमा नपर्ने तर्क गरेका छन्। उनले सञ्चार उद्यमी जिम्मी लाइको मुद्दाभन्दा वङको कसुर कम गम्भीर रहेको जिकिर गर्दै दोष स्वीकार गरेको र अभियोजन प्रक्रियामा भएको ढिलाइलाई सजाय निर्धारण गर्दा ध्यान दिन अदालतसँग आग्रह गरेका छन्।
प्रतिरक्षा पक्षले सुरुको सजाय १० वर्षभन्दा बढी नहुने गरी निर्धारण गर्न र त्यसपछि दोष स्वीकार गरेको आधारमा थप छुट दिन माग गरेको छ। वङको भविष्यप्रति केही आशा बाँकी रहने गरी सजाय निर्धारण गर्नुपर्ने वकिल चानको तर्क छ।
वङ सन् २०१४ को ‘अम्ब्रेला मुभमेन्ट’ र सन् २०१९ का सरकारविरोधी प्रदर्शनपछि हङकङको प्रजातन्त्र समर्थक आन्दोलनका प्रमुख अनुहारका रूपमा स्थापित भएका थिए। उनको मुद्दालाई हङकङमा राष्ट्रिय सुरक्षा कानुनको प्रयोग र प्रजातन्त्र समर्थक गतिविधिमाथिको कानुनी कारबाहीसँग जोडेर हेरिँदै आएको छ।
