काठमाडौं । यमनका हुथी विद्रोहीले साउदी अरेबियामाथि क्षेप्यास्त्र र ड्रोन आक्रमण गरेपछि मध्यपूर्वमा सुरक्षा तनाव थप चर्किएको छ। घटनापछि अमेरिकाले आफ्ना नागरिकलाई उच्च सतर्कता अपनाउन आग्रह गर्दै क्षेत्रभर रहेका दूतावास तथा कूटनीतिक नियोगमार्फत सुरक्षा चेतावनी जारी गरेको छ। अमेरिकी अधिकारीहरूले सैन्य संघर्षको अवस्था ‘तीव्र रूपमा थप बिग्रिन सक्ने’ भन्दै सम्भावित जोखिमप्रति सचेत रहन आग्रह गरेका छन्।
अमेरिकी सुरक्षा चेतावनी साउदी अरेबियासहित इजरायल, बहराइन, इराक, जोर्डन, कुवेत, लेबनान, ओमान, कतार र संयुक्त अरब इमिरेट्समा रहेका अमेरिकी कूटनीतिक नियोगमार्फत जारी गरिएको छ। नागरिकलाई स्थानीय सुरक्षा अवस्थाबारे निरन्तर जानकारी लिन, आकस्मिक अवस्थाका लागि तयारी गर्न तथा उडान रद्द हुन सक्ने, हवाई क्षेत्र बन्द हुन सक्ने र स्थल तथा समुद्री यातायातमा अवरोध आउन सक्ने विषयमा सतर्क रहन भनिएको छ।
यो चेतावनी साउदी राजधानी रियादमाथि हुथीहरूले गरेको दाबी गरिएको पछिल्लो आक्रमणपछि आएको हो। हुथीहरूले शनिबार रियादका ‘संवेदनशील स्थान’ तथा रेड सीको तटीय शहर यान्बुस्थित साउदी तेल कम्पनी आराम्कोका संरचनालाई लक्षित गर्दै ब्यालेस्टिक तथा क्रुज क्षेप्यास्त्र र ड्रोन प्रयोग गरिएको दाबी गरेका थिए। साउदी नेतृत्वको गठबन्धनले भने रियादतर्फ प्रहार गरिएको एक ब्यालेस्टिक क्षेप्यास्त्र आफ्नो हवाई प्रतिरक्षा प्रणालीले रोकेको जनाएको छ।
आक्रमणकै क्रममा रियादस्थित किङ खालिद अन्तर्राष्ट्रिय विमानस्थलनजिक आगो र बाक्लो कालो धुवाँ देखिएको थियो। घटनापछि विमानस्थलको उडान सञ्चालनमा ठूलो अवरोध आएको र केही उडान ढिला तथा रद्द भएको अन्तर्राष्ट्रिय सञ्चारमाध्यमहरूले जनाएका छन्। यद्यपि, साउदी अधिकारीहरूले रियादमा क्षेप्यास्त्र अवरोध गरिएको र तत्काल कुनै मानवीय क्षति वा ठूलो संरचनागत क्षति पुष्टि नभएको बताएका छन्।
यसैबीच, अमेरिकी मिसनले साउदी अरेबियाका ताइफ र यान्बु शहरमा अमेरिकी सरकारी कर्मचारीको आवागमनमा विशेष अनुमति अनिवार्य गरेको छ। अमेरिकी नागरिकलाई सम्भावित हवाई आक्रमणको अवस्थामा झ्याल तथा काँचका ढोकाबाट टाढा रहन, मोबाइल फोन चार्ज राख्न, स्थानीय सञ्चारमाध्यम तथा सरकारी निर्देशन निगरानी गर्न र भीडभाड तथा सुरक्षा संवेदनशील क्षेत्रबाट टाढा रहनसमेत भनिएको छ।
हुथी आक्रमणको दायरा रियादमा मात्र सीमित रहेको छैन। साउदी पक्षका अनुसार बिशा, ताइफ, फरासान र यान्बुलाई समेत लक्षित गर्ने प्रयास भएको थियो, जसलाई हवाई प्रतिरक्षा प्रणालीले विफल बनाएको दाबी गरिएको छ। हुथीहरूले भने यी आक्रमणलाई साउदी पक्षबाट यमनमा भएका सैन्य कारबाहीको जवाफका रूपमा प्रस्तुत गरेका छन्। दुवै पक्षका केही दाबी स्वतन्त्र रूपमा पूर्ण रूपमा पुष्टि हुन बाँकी छन्।
तनाव बढेसँगै यसको असर हवाई यात्रादेखि क्षेत्रीय ऊर्जा तथा व्यापार मार्गसम्म पर्न सक्ने चिन्ता बढेको छ। रियादमाथिको आक्रमणपछि आइतबार खाडी क्षेत्रका केही सेयर बजारमा समेत गिरावट देखिएको रोयटर्सले जनाएको छ।
यसैबीच, संयुक्त राष्ट्रसंघले नागरिक तथा नागरिक पूर्वाधारलाई लक्षित गर्ने आक्रमणप्रति चिन्ता व्यक्त गर्दै तनाव कम गर्न आह्वान गरेको छ। अमेरिकाको पछिल्लो सुरक्षा चेतावनीले पनि साउदी–हुथी संघर्ष अब केवल यमनको युद्धमा सीमित नरही सम्पूर्ण खाडी क्षेत्रको सुरक्षा, हवाई यातायात र ऊर्जा पूर्वाधारमा प्रभाव पार्न सक्ने जोखिमप्रति अन्तर्राष्ट्रिय चिन्ता बढेको संकेत गरेको छ।