चीनको १९ सिटे विद्युतीय यात्रुवाहक विमान ‘कोम्याक सिइ–२५ए’ ले चालकदलसहितको पहिलो परीक्षण उडान सफलतापूर्वक सम्पन्न गरेको छ। कमर्सियल एयरक्राफ्ट कर्पोरेसन अफ चाइना (कोम्याक), चिनियाँ ब्याट्री निर्माता कम्पनी सिएटीएल र साङ्घाई जिआओ टोङ विश्वविद्यालयको संयुक्त साझेदारीमा विकास गरिएको १० टन क्षमताको उक्त विमानले नोभेम्बर १४, २०२६ मा सानडोङ प्रान्तको बिनझोउमा पहिलो मानवसहितको उडान भरेको हो। परीक्षण उडानका क्रममा विमानमा दुई जना पाइलट र एक जना फ्लाइट–टेस्ट इन्जिनियर सवार थिए।
छोटो दूरीको क्षेत्रीय अन्तर–सहर उडानका लागि डिजाइन गरिएको यस विमानले अधिकतम १९ जना यात्रु बोक्न सक्छ। परम्परागत इन्धनयुक्त जेट इन्जिन वा प्रोपेलरको सट्टा विमानमा आधुनिक वितरित विद्युतीय प्रोपल्सन प्रणाली जडान गरिएको छ। विमानका दुवै पखेटामा पाँच–पाँचवटा गरी कुल १० वटा विद्युतीय ‘डक्टेड फ्यान’ राखिएका छन्। एकपटकको पूर्ण चार्जमा ४०० किलोमिटर (२५० माइल) सम्म उड्न सक्ने क्षमता रहेको यस विमानको क्रुजिङ गति प्रतिघण्टा ३०० किलोमिटर र उडान उचाइ २ हजार ४०० मिटर रहेको छ। यसअघि सन् २०२३ मा सार्वजनिक अवधारणा मोडलमा ५०० किलोमिटरसम्मको रेन्ज लक्ष्य राखिएको थियो।
‘सिइ–२५ए’ विमानले मानवरहित स्वायत्त परीक्षण चरण पार गर्दै चालकदलसहितको उडानमा सफलता हासिल गरेको हो। यसले गत फेब्रुअरी २, २०२६ मा पहिलो मानवरहित स्वायत्त उडान भरेपछि थप १९ वटा मानवरहित प्रमाणीकरण उडानहरू पूरा गरिसकेको छ। हाल चीनको नागरिक उड्डयन प्रशासन (सिएएसी) ले ‘सिसिएआर–२५’ यातायात–श्रेणी नियमनअन्तर्गत कोम्याकको ‘टाइप सर्टिफिकेट’ आवेदन स्वीकार गर्दै औपचारिक हवाई योग्यता समीक्षा सुरु गरेको छ। यद्यपि, व्यावसायिक यात्रुवाहक सेवा कहिलेदेखि सुरु हुन्छ भन्ने मिति कोम्याकले हालसम्म सार्वजनिक गरेको छैन।