​काठमाडौँ। टर्कीको अन्टाल्यामा सञ्चालित जलवायु परिवर्तनसम्बन्धी संयुक्त राष्ट्रसङ्घीय सम्मेलन ‘कोप-३१’ को उद्घाटन सत्रलाई सम्बोधन गर्दै नेपाली प्रतिनिधिमण्डलका नेता तथा परराष्ट्रमन्त्री सिसिर खनालले अन्तर्राष्ट्रिय समुदायलाई आफ्ना प्रतिबद्धताहरू कार्यमा ढाल्न आह्वान गरेका छन्।

​सम्बोधनका क्रममा मन्त्री खनालले हालै नेपालले भोग्नुपरेको अभूतपूर्व जलवायुजन्य विपद्पछि प्राप्त अन्तर्राष्ट्रिय सहानुभूतिलाई अब कार्यगत प्रणाली र व्यावहारिक कार्यान्वयनमा बदल्ने समय आएको बताए। उनले कोप-३१ प्रक्रियाअन्तर्गत ‘हिमाल र जलवायु परिवर्तन’ विषयमा छुट्टै र समर्पित कार्ययोजना स्थापना गर्नुपर्नेमा विशेष जोड दिएका छन्।

​मन्त्री खनालले तापक्रम वृद्धिलाई १.५ डिग्री सेल्सियसमा सीमित राख्ने लक्ष्यलाई जीवितै राख्नुपर्ने, अनुकूलनसम्बन्धी विश्वव्यापी लक्ष्य ढाँचामा हिमाल-विशेष सूचकहरूलाई समावेश गरिनुपर्ने र नयाँ सामूहिक परिमाणात्मक लक्ष्य अन्तर्गत पर्याप्त जलवायु वित्तको व्यवस्था हुनुपर्ने माग राखे।

विश्वका १५ प्रतिशत जनसङ्ख्याको जीवन आधार रहेको संवेदनशील पर्वतीय पारिस्थितिक प्रणालीको संरक्षण गर्नुपर्ने र ‘सगरमाथादेखि समुद्रसम्म’ परेको असरलाई एकीकृत रूपमा सम्बोधन गर्नुपर्ने उनको भनाइ थियो। उनले नेपाललाई विपद्पछि थप सुदृढ, तीव्र र समतामूलक रूपमा पुनर्निर्माण गर्न अन्तर्राष्ट्रिय समुदायको सहयोगको अपेक्षा व्यक्त गरेका छन्।