काठमाडौँ। डोल्पा जिल्लाको सदरमुकाम दुनैस्थित जिल्ला कारागारबाट सुरुङ खनेर ८ जना कैदीबन्दी फरार भएका छन्। २०८३ कात्तिक १४ गते शुक्रबार राति भएको उक्त घटना शनिबार बिहान ६ बजे नियमित कैदीबन्दी गणना गर्ने क्रममा ८ जना अनुपस्थित भेटिएपछि मात्रै बाहिर आएको हो।
भेरी नदीको किनारमा अवस्थित उक्त कारागारको कोठाभित्रबाट पुरानो सेप्टिक ट्याङ्की हुँदै बाहिरको खेलमैदानतर्फ निस्किने गरी करिब ४.६३ मिटर लामो सुरुङ खनेर कैदीबन्दीहरू भाग्न सफल भएका हुन्। कारागारमा रहेका कुल १७ जना कैदीबन्दीमध्ये ८ जना फरार भएका छन् भने बाँकी ९ जना कारागारमै रहेका छन्। फरार हुनेहरूमा ५ जना जबरजस्ती करणी (बलात्कार) र ३ जना चोरी मुद्दाका छन्। तीमध्ये ६ जना अदालतबाट सजाय तोकिसकिएका कैदी हुन् भने २ जना पुर्पक्षका लागि थुनामा रहेका थुनुवा हुन्।
प्रहरीका अनुसार फरार हुनेहरूमा रुकुम पश्चिमका राम विक, डोल्पाका कालीप्रसाद रोकाय, सल्यानका रेशम राना र जाजरकोटका कैदीबन्दीहरू रहेका छन्। घटनालगत्तै प्रमुख जिल्ला अधिकारी जुनु हमाल ढकाल र डीएसपी अनिलराज गिरीसहितको उच्चस्तरीय सुरक्षा टोलीले घटनास्थलको निरीक्षण गरेको छ। प्रहरीले जिल्लाका सबै नाकाहरूमा सुरक्षा निगरानी कडा पार्दै फरारहरूको खोजी कार्य तीव्र बनाएको छ। कारागारभित्र सुरुङ खन्ने औजार कसरी पुग्यो र सुरक्षाकर्मीले पत्ता पाउन सकेनन् भन्ने विषयमाथि गम्भीर अनुसन्धान अघि बढाइएको छ।
