काठमाडौँ। नेपाल प्रिमियर लिग (एनपीएल–३) मा काठमाडौं गोर्खाजबाट खेलिरहेका अस्ट्रेलियाका स्टार क्रिकेटर डेभिड वार्नर नेपालीहरूको माया, आत्मीयता र आतिथ्यबाट गहिरो रूपमा प्रभावित भएका छन्। नेपालमा बिताएका अनुभवहरू सामाजिक सञ्जालमार्फत साट्दै उनले नेपालीहरूको खुलेर प्रशंसा गरेका छन्।
नेपाललाई एक अद्भुत देश भन्दै वार्नरले यहाँका मानिसहरू झनै अद्भुत रहेको बताएका छन्। देशको जुनसुकै कुनामा पुग्दा पनि स्थानीय बासिन्दाबाट पाइएको मुस्कानसहितको स्वागत, उनीहरूको दयालुपन र उदारस्वभावले आफूलाई अत्यन्त विशेष अनुभूति गराएको उनको भनाइ छ। साथै, नेपालमा क्रिकेट खेलप्रति रहेको क्रेज र जनताको उत्साहलाई उनले अविश्वसनीय भनेका छन्।
विश्वचर्चित खेलाडी वार्नरको यो भनाइले नेपालको प्राकृतिक सौन्दर्य मात्र नभई नेपालीहरूको आतिथ्य र संस्कारलाई पनि अन्तर्राष्ट्रिय स्तरमा चिनारी गराएको छ।
