काठमाडौँ। जलवायु न्याय र अन्तर्राष्ट्रिय ऐक्यबद्धताका क्षेत्रमा एक ऐतिहासिक कोशेढुङ्गा साबित गर्दै हानिनोक्सानी कोषको पहिलो विशेष बोर्ड बैठकले नेपाललाई २१.६ मिलियन अमेरिकी डलर सहयोग उपलब्ध गराउने निर्णय गरेको छ।
गत अगस्ट २६, २०२६ मा भोटेकोशी तथा त्रिशूली नदीमा आएको विनाशकारी बाढीका कारण प्रभावित समुदायको पुनर्स्थापना, पुनःनिर्माण र जीविकोपार्जन सुधारका लागि उक्त बजेट प्रारम्भिक रूपमा विनियोजन गरिएको हो।
कप-२८ सम्मेलनमार्फत कोष सञ्चालनमा आएयता अचानक आएको जलवायुजन्य विपद्बाट प्रभावित देशलाई सहयोग गरिएको यो पहिलो ऐतिहासिक अवसर हो।
बारबाडोस कार्यान्वयन ढाँचा अन्तर्गत द्रुत र लचिलो प्रक्रिया अपनाएर लिइएको यस निर्णयले विपद्को समयमा द्रुत बहुपक्षीय सहयोग उपलब्ध गराउन सकिने एक शक्तिशाली नजिर स्थापित गरेको छ।
नेपाल सरकारको अर्थ मन्त्रालय र कृषि, वन तथा वातावरण मन्त्रालयको नेतृत्वदायी पहलमा यो ठूलो अन्तर्राष्ट्रिय सहयोग प्राप्त भएको हो। यस निर्णयले भोटेकोशी-त्रिशूली करिडोरमा पुनःनिर्माणको पर्खाइमा रहेका प्रभावित समुदायलाई ठूलो आशा र स्रोत उपलब्ध गराएको छ।
युएनडीपी नेपालले प्राप्त सहयोगलाई तल्लो तहसम्म प्रभावकारी र जलवायु-उत्थानशील पुनःनिर्माणमा रूपान्तरण गर्न राष्ट्रिय तथा स्थानीय निकायहरूसँग निरन्तर सहकार्य गर्ने जनाएको छ।
