काठमाडौं । देशमा आएको विनाशकारी बाढीका कारण हजारौँ नेपाली नागरिकले घरबार, सम्पत्ति तथा आफन्तजन गुमाइरहेका बेला पूर्व कुलपति तथा चित्रकार रागिनी उपाध्यायले विपद्मा परेका नागरिकको सहयोगका लागि हात बढाएकी छन्।

उपाध्यायले प्रधानमन्त्री राहत कोषमा आफ्नो तर्फबाट ५० हजार रुपैयाँ सहयोग गरेकी छन्। उनले आफू स्वयं बिरामी अवस्थाबाट गुज्रिरहेको भए पनि बाढीका कारण सिर्जित मानवीय संकट र नेपाली नागरिकले भोग्नुपरेको पीडाले आफ्नो मन असह्य पीडाले भरिएको बताएकी छन्।

नेपाली कला तथा समाजसेवामा निरन्तर सक्रिय रहँदै आएकी उपाध्यायले आफ्नो सामाजिक दायित्व र कर्तव्य सम्झेर विपत्तिको यस कठिन घडीमा सहयोग गरेको उल्लेख गरेकी छन्।

उनले बाढी तथा अन्य प्राकृतिक विपत्तिका कारण ठूलो जनधनको क्षति भइरहेका बेला पीडित परिवारलाई सहयोग गर्नु सबैको साझा जिम्मेवारी भएको बताएकी छन्। आफ्नो र आफ्नो परिवारका लागि सबैले आ-आफ्नो क्षमताअनुसार गर्दै आएको भए पनि व्यक्तिगत स्वार्थभन्दा माथि उठेर दुःखमा परेका मानिसका लागि केही गर्न सक्नु नै साँचो मानवता र सबैभन्दा ठूलो धर्म भएको उनको भनाइ छ।

सामाजिक सञ्जालमार्फत आफ्नो धारणा सार्वजनिक गर्दै उपाध्यायले विपत्तिमा परेका नागरिकका लागि आफ्नो हैसियत र क्षमताअनुसार सहयोग गर्न सबै नेपालीलाई अपिलसमेत गरेकी छन्।

उनले आफूले दिएको सहयोगलाई ठूलो योगदानका रूपमा भन्दा पनि विपत्तिमा परेका नेपाली नागरिकप्रतिको ऐक्यबद्धताका रूपमा प्रस्तुत गरेकी छन्। उनका अनुसार संकटमा परेको व्यक्तिका लागि सानो देखिने सहयोगसमेत महत्वपूर्ण बन्न सक्छ। आज पीडितका लागि प्रदान गरिएको सानो सहयोगले समेत कसैका लागि जीवन जोगाउने आशा र सहारा बन्न सक्ने उनले उल्लेख गरेकी छन्।

उपाध्यायले ‘मानवता नै सबैभन्दा ठूलो धर्म हो’ भन्ने सन्देशसहित विपत्तिमा परेका नेपाली दाजुभाइ तथा दिदीबहिनीको साथमा उभिन सबैलाई आग्रह गरेकी छन्।

कलाकार तथा समाजसेवीका रूपमा परिचित उपाध्यायको यो सहयोगले प्राकृतिक विपत्तिबाट प्रभावित नागरिकलाई राहत उपलब्ध गराउने अभियानमा थप सहयोग जुटाउन प्रेरणा पुग्ने अपेक्षा गरिएको छ।