नेपाली मिक्स्ड मार्सल आर्ट्स (एमएमए) स्टार रवीन्द्र ढाँटले रोड टु यूएफसी सिजन–५ को बान्टमवेट प्रतियोगिताको फाइनलमा स्थान सुरक्षित गरेका छन्। ‘बझाङका बाघ’का रूपमा परिचित ढाँटले न्युजिल्यान्डका अपराजित खेलाडी कासिब मर्डकलाई स्प्लिट निर्णयमार्फत पराजित गर्दै ऐतिहासिक उपलब्धि हासिल गरेका हुन्।
यस जितसँगै ढाँटले मर्डकलाई उनको व्यावसायिक करिअरकै पहिलो हार चखाएका छन्। साथै, रोड टु यूएफसी प्रतियोगिताको फाइनलमा पुग्ने पहिलो नेपाली खेलाडी बनेर उनले नेपाली एमएमएको इतिहासमा नयाँ अध्याय थपेका छन्। अब ढाँट प्रतिष्ठित बहु–फाइट आधिकारिक यूएफसी सम्झौताबाट केवल एक जित टाढा छन्।
जितपछि ढाँटले खेलको सफलताभन्दा बाहिर नेपालको पछिल्लो अवस्थाप्रति समेत चिन्ता व्यक्त गर्दै नेपालीहरूलाई सहयोगका लागि अपिल गरेका छन्। उनले भने, “अहिले नेपालमा धेरै नै गाह्रो अवस्थाहरू भइरहेछ। बाढी र पहिरो गर्दाखेरि। प्लीज, आफू–आफ्नो ठाउँबाट जति सक्नुहुन्छ सहयोग गरिदिनुहोला।” ढाँटको यो अपिलले अन्तर्राष्ट्रिय खेलमञ्चमा नेपालको प्रतिनिधित्व गरिरहेका उनको देशप्रतिको संवेदनशीलता र जिम्मेवारीबोधसमेत झल्काएको छ।
ढाँटले रोड टु यूएफसी सिजन–५ को यात्रा पहिलो चरणदेखि नै प्रभावशाली ढंगले अघि बढाएका थिए। उनले पहिलो चरणमा फिलिपिन्सका किम्बर्ट अलिन्टोजोनलाई दोस्रो राउन्डमा टीकेओमार्फत पराजित गर्दै सेमिफाइनलमा स्थान बनाएका थिए। त्यसपछि सेमिफाइनलमा मर्डकविरुद्ध निर्णायक प्रदर्शन गर्दै फाइनलको यात्रा तय गरेका हुन्।
ढाँटले पराजित गरेका मर्डक यसअघि अपराजित थिए। उनको लगातार जितको यात्रामा ढाँटले पूर्णविराम लगाउँदै आफ्नो अन्तर्राष्ट्रिय पहिचान थप बलियो बनाएका छन्। ढाँटको यो प्रदर्शनले नेपालबाट अन्तर्राष्ट्रिय एमएमएको उच्च तहमा पुग्ने सम्भावनालाई समेत थप बलियो बनाएको छ।
अब बान्टमवेट फाइनलमा ढाँटले जापानका र्यो ताजिमासँग प्रतिस्पर्धा गर्नेछन्। ताजिमाले सोही कार्डमा भारतका चुङग्रेन कोरेनलाई सर्वसम्मत निर्णयका आधारमा पराजित गर्दै फाइनलमा स्थान बनाएका हुन्।
रोड टु यूएफसी एसिया–प्रशान्त क्षेत्रका प्रतिभाशाली एमएमए खेलाडीलाई यूएफसीको मुख्य मञ्चसम्म पुग्ने अवसर प्रदान गर्ने प्रतियोगिता हो। ढाँटका लागि अबको फाइनल केवल उपाधिका लागि हुने भिडन्त मात्र नभई आधिकारिक यूएफसी सम्झौता हासिल गर्ने ऐतिहासिक अवसरसमेत हुनेछ।
यसरी, रिङमा ऐतिहासिक जित हासिल गर्दै नेपाली एमएमएको झण्डा उचालेका ढाँटले खेलपछि भने नेपालमा बाढीपहिरोबाट प्रभावित नागरिकलाई सम्झँदै “आफ–आफ्नो ठाउँबाट जति सक्नुहुन्छ सहयोग गरिदिनुहोला” भन्दै गरेको अपिलले उनको यो जितलाई खेलकुदभन्दा पर मानवीय सन्देशसँग पनि जोडिदिएको छ।